Owruyari fu wan yuli tudusun-tinadri (2013)

– Hein Eersel –

Den afo, totro nanga wôwo fu wi, di dede na keti, bifo wan yuli tina-ayti-hondro siksitentinadri ( 1863). Wi e kari , Un, wi afo, na un deynen, bika , den katibomasra ben fufuru un tru nen. Ma wi e memre un dineti na un deynen.

Un Kwasi nanga Un Kwasiba, wi e memre a katibopina san un tyari. Wi e begi un, way maka gi wi, un bakawan, na wi pasi fu tamara.

( Apintidron) 

Un Kodyo nanga Un Adyuba, wi e memre den pranasi ben un watrây ben fadon, pe un brudu ben lon. Wi e begi un, kraka wi na den ten san e kon, fu tay hori.

(Apintidron)

Un Kwamina nanga Un Abeniba, wi e memre fa, te nowtu ben moro un, un ben e feti te dede. Wi en begi un dineti, kibri wi fu nyun sortu katibo.

(Apintidron)

Un Kwaku nanga Un Akuba, wi e memre fa den proberi fu brokosa­ka un yeye, ma fa un kra wini pasa katibo. Tye, gi wi wan anu, meki noyti wi no afrontu wi kra.

(Apintidron)

Un Yaw nanga Un Yaba, wi e memre den boto san tyari un kon na Sranankondre. A watra san Un koti abra nanga den brantimarki na un baka, wi, den bakawan fu unu, e firi den te now ete. Yepi wi fu no tan krey, ma fu tiri wi friboto go moro fara.

(Apintidron)

Un Kofi nanga Un Afiba, wi en memre un nen. Wi e memre fa un gwe go seti wan fri libi na busikondre. Sori wi, un bakawan, a pasi fu seti wi eygi trutru fri libimakandra.

(Apintidron)

Un Kwami nanga Un Amimba, wi e memre san den katibomasra ben du nanga un, bikasi den ben e kari densrefi un eyginari. Tye, yepi wi fu tron wan trutru eyginari fu wi eygisrefi èn no meki trawan basi wi yeye.

(Apintidron)

Wi afo, wi totro, wi wôwo, un alamala di ben de na keti na kati­boten, wi e memre Un. Grantangi fu Un, keti koti gi wi. Wi e kari un nen nanga respeki dineti. Kraka wi.